Palla Khereske dokkepa

Khereske dokkepa-tjakk aschar dova

Ninna Khereske dokkepa nascht diro latscha mukhalo loddepa dre Stockholm them. Loddepa delas palla jekh kösystem palla pre kö tija. Gla te nascht le jekh lodd mostula diro registrera diro dre loddeske biddrepan.

Kon nascht registrera siro dre loddeske biddrepan?

Sassaro tjakk honkar 18 bersch vai purane ta kamma jekh schwediko personnummer vai samordningsnummer nascht registrera siro dre loddeske biddrepan. Dova kerar chi nane palla diro boddrar vai palla diro kammar jekh lodd. Karna diro registrerat diro avar diro dre biddrepan. Doj palla nascht diro latscha palla loddepa ta penna to gla specifika loddepa. Dova molla 200 lokher pre bersch te steddra dre biddrepa. 

Chi savrige typer aschter loddepa

Khereske dokkepan kammar but chi savrige aschter loddepa. Dova nascht saro dre loddeskebiddrepan latscha, men kommoni loddepan aschar öronmärkta gla särskilda grupper. 

• Studentlodd: Gla diro tjakkes studerar ninna universitet vai yrkeshögskola.
• Ternelodd: Gla diro maskar 18 vai 25 bersch. 
• Puranelodd: Gla diro tjakkes honkar 55 bersch vai purane.
• Kuttitijakontrakt: Kontrakt ninna begränsad boddreske tija. Fysser diro jekh kuttitijakontrakt kammar diro kendralo biddrepa.  

Latscha loddepa aktivt

Diro trobul kokkaro latscha dova mukhalo loddepan tjakkes annonseras pre vorsnos khereskerigg. Dre svako annonshonkar detaljerad information palla loddepat ta hyresvärdens godkännande villkor. Karna diro aschar andre nascht diro andokka intresse dre annonsen. Dova butider aktiv diro honkar gla baroare chans kamma diro to fyssa jekh loddepa.

Sar langsno tija ler dova te kamma jekh loddepa?

Biddreske tija avar pre but faktorer, bland vaver so diro voltra boddra ta sar baro prejjsepa diro voltra prejsa. Dova genomsnittliga biddreske tija honkar 9 bersch men nascht honka kutider ta durier. Ofta honkar biddreske tija durier gla loddepa dre centrala Stockholm vai nerider thema, jämfört ninna them durier fann foro.

Glabakko: Pal diro kammar soraloa drabbeske vai sociala skäl nascht diro penna to ja vago dre biddrepan. Dova aschar bara jekh kutti andel tjakkes opprepherdo kraven gla beviljas glabakko.

So diro fyssa jekh loddepa

Akaj dikka diro steg gla steg so diro kerar gla fyssa jekh loddepa palla vorsnos. Gla te nascht latscha jekh loddepa mostula diro vagerst honka registrerad tjakk loddeske roddrepaskro. Diro registerar diro pre vorsnos khereskerigg ta diro trobul jekh kamma jekh e-legitimation. Om diro chi kammar möjlighet te kamma jekh e-legitimation honkar diro välkommen te penna to vorsnos kundservice tjakkes haschta diro ninna registreringen.

1. Roddra jekh loddepa 

Diro roddrar kokkaro bland annonserna dre avsnittet Mukhaloa loddepa (Lediga bostäder) pre vorsnos khereskerigg. Doj nascht diro filtrera diro roddrepa avri fann vaver kriterier, gla te lokhi dikka jekheske dova loddepan tjakkes aschar gla diro. Gla te andokka intresse mostula diro ja andre tele Miro rigg (Mina sidor) nascht diro jura savo händer ninna diro andokkning. Loddepan annonseras normalt dre 3–7 dives. 

2. Ja pre sikkrepa ta penna diro intresse

Palla diro honkar lengero ninna durider biddreske tija bland dova intresserade, fyssa diro jekh andrebjuddran to sikkrepa karna roddresketija kamma jatt avri. Kommoni hyresvärdar honkar potto te dova tjakkes erbjuds loddepat kamma dikkat dova vago kontrakt randras. Doj gla aschar dova viktigt te drabbra savo villkor tjakkes honkar gla just dova loddepa diro aschar intresserad aschter.

Palla sikkrepa trobul diro penna to pal diro fortfarande honkar intresserad aschter loddepat. Dova kerar diro jekheske pre Miro rigg (Mina sidor) doj diro svardara Ehe vai Chi.

Ibland nascht diro fyssa butider alternativ, särskilt vid nevokerat. Då mostula diro pucha prioriteringsordning. Dosta svarsdatum ster dre sikkreske andrebjuddran. 

Schunn: Kommoni hyresvärdar dokka chi sikkrepan. Då fyssa diro le ställning pal diro voltra kamma loddepat avri fann informationen dre annonsen.

3. Loddeske erbjudande ta intyg

Tjakk diro opprepherda hyresvärdens villkor ta kamma duriast biddreske tija, fyssa diro jekh loddeske erbjudande ninna instruktioner palla nästa steg. Diro trubul då bischa andre intyg tjakkes sorda diro uppgifter. Dikka dojgla to te diro uppgifter aschar uppdaterade pre Miro rigg (Mina sidor) (Kontaktuppgifter, love, mengrepa ninna butider).

4.  Randra kontrakt

Karna diro dokkat diro intyg ta bliddra prinschalo aschter vorsnos bischar vorsnos diros uppgifter to hyresvärden ta föreslår diro tjakk hyresgäst. Pal hyresvärden godkänner diro nascht ersnos randra kontrakt. Karna kontraktet aschar telerandrat nollställs diro roddresketija, men diro ster automatiskt kvar dre roddrepan tjakkes langsno diro prejsa berscheske prejsepa. Dre kommoni fall nascht diro kamma diro roddresketija. Dova aschar palla diro kontrakt honkar kommoni kavva loddrepan:

• Loddepa gla purane
• Student loddepa
• Terne loddepa
• Kuttitija kontrakt

Miro rigg 

Pre Miro rigg (Mina sidor) nascht diro jura dova loddepan diro sikkrat intresse gla. Kaj latschar diro även information palla diro roddreske tija, berscheskeprejsepa ta nascht uppdatera diro personuppgifter. Gla te ava to Miro rigg (Mina sidor) mostula diro ava andre.

Ava andre 

Dova enklaste ta fedder sättet te ja andre aschar ninna e-legitimation (BankID vai Freja elD+). Pal diro chi kamma e-legitimation nascht diro kera jekh konto ninna e-postadress ta jekh lösen lav.

Kontaktuppgifter
Kundservice
Telefon: 08-785 88 30

Mejl: kundservice@bostad.stockholm.se

Postadress
Bostadsförmedlingen i Stockholm AB
Box 7026
121 07 Stockholm-Globen