Asuntovälityksestä

Asuntovälitys – Näin se toimii

Asuntovälityksestä sie saatat hakea vaphaita hyyrylääkenheettiä Stokholminaluheela. Asunot jaethaan jonosysteemin mukhaan joka perustuu jonoaikhaan. Sie häyt rekistreerata ittesti asuntojonhoon ette saattaa hakea asuntoa.

Kukas saattaa rekistreerata ittensä asuntojonhoon?

Kaikin jokka oon 18 vuotta elikkä vanheemat ja jollako oon ruottalainen personnummer (henkilönumero) elikkä samordningsnummer (sovitusnumero) saattavat rekistreerata ittensä asuntojonhoon. Ei se pellaa rollia missä sie asut elikkä jos sulla oon jo asunto. Ko sie rekistreeraat ittesti sinun panthaan jonhoon. Sen jälkhiin sie saatat alkaa hakheen lääkenheettiä ja ilmottaa innostuksen erityisille asunoile.  Se maksaa 200 kruunua vuosittain ette olla jonossa.  

Eri asuntomuotoja

Asuntovälityksellä oon monen sorttisia lääkenheettiä. Usseimpia saattavat kaikin asuntojonossa hakea, mutta vissit lääkenheetit oon merkitty erityisille ryhmile.

• Stytenttiasunot: Sulle joka opiskelet yniversiteetissä elikkä ammattikorkeakoulussa.
• Nuorisoasunot: Sulle joka olet 18 ja 25 vuen välisen ikänen.
• Seniooriasunot: Sulle joka olet 55 vuotta elikkä vanheempi.
• Lyhyaikakontrahti: Kontrahti rajotetulla asumisaijala. Jos sie saat lyhyaikakontrahin sie piät jäljelä sinun yhtheenkarttunheen jonoaijan. 

Hae asuntoa aktiivisti

Sie piät itte hakea vaphaita lääkenheettiä joitako anonseerathaan meän webbipaikala. Joka anonsissa oon tetalieerattua informasuunia asunosta ja hyyryväärtin hyväksymisehoista. Ko sie olet lokattu sisäle sie saatat ilmottaa innostuksen suohraan anonshiin. Mitä aktiivisempi sie olet, sen suurempi maholisuus sulla oon saaja asunon.

Kunkas pitkhään se mennee ette saaja asunon?

Jonoaika riippuu monesta faktorista, muun muassa missä sie halvaat asua ja kunka paljon sie olet valmis maksamhaan. Keskimääränen jonoaika oon 9 vuotta mutta saattaa olla niin lyhykäisempi ko pitempi. Useasti jonoaika oon pitempi asunoile Stokholmin kekustassa elikkä likialuheila, verraten aluheishiin  eempänä kaupunkista.

Etuoikeus: Jos sulla oon suuret lääketietheeliset elikkä sosiaalit syyt sie saatat hakea ette mennä muita etheen jonossa. Se ei kuitenkhaan ole ko pienempi määrä niistä jokka täyttävät vaatimukset joilekko myönethään etuoikeus.

Kunka sie saat asunon

Tässä sie näet askel toisen perässä kunka sie tehet ette saaja asunon meän kautta. Ette saattaa hakea lääkenheetiä sie piät ensinä olla rekistreerattu asuntohakianna. Rekistreerinkin sie tehet meän webbipaikala ja silloin sie tarttet käyttää e-lekitimasuunia. Jos sulla ei ole maholisuus käyttää e-lekitimasuunia sie olet sen siihaans tervetullu ottamhaan yhtheyttä meän asiakaspalvelun kansa joka auttaa sinua rekistreerinkin kansa.

1. Hae lääkenheetti

Sie haet itte anonsitten seurasta osassa Lediga bostäder (Vaphaat asunot) meän webbipaikala. Sielä sie saatat filtreerata sinun hakua eri kriterieistä lähtien, ette sie helpomasti näet vain niitä asuntoja jokka oon kysheissä sulle. Ette ilmottaa sinun innostuksen sie tarttet lokata sisäle. Fliikin alla Mina sidor (Minun sivut) sie saatat seurata mitä sinun haun kansa tapahtuu. Lääkenheettiä anonseerathaan normaalisti 3–7 päivää.

2. Käy näyttelyssä ja vahvista sinun innostus

Jos sie kuulut niishiin innostunheishiin joilako oon pissiin jonoaika, niin sie saat kuttumuksen näyttelhyyn ko hakuaika oon päättyny. Jokku hyyryväärtit vaativat ette se jollekko tarjothaan lääkenheetti oon nähny sen ennen ko kontrahti kirjotethaan. Sen takia se oon tärkeätä lukea mikkä ehot jällaavat justhiins sille asunolle jostako sie olet innostunnu.

Näyttelyn jälkhiin sie tarttet vahvistaa jos sie vieläki olet innostunnu asunosta. Sen sie tehet helpoimiten Mina sidor (Minun sivut) kautta jossako sie vastaat Joo elikkä Ei. 

Joskus sie saatat saaja useaman vaihtoehon, olletikki uustuotetuista lääkenheetistä. Silloin sie häyt kirjottaa priuriteerinkijärjestyksen. Viiminen vastaustaatumi oon näyttelykuttumuksessa. 

Huomaa: Jokku hyyryväärtit ei tarjoa näyttelyä. Sie saat silloin itte päättää jos sie halvaat asunon sen informasuunin mukhaan mitä oon anonsissa. 

4. Asuntotarjous ja toistus

Sie saat asuntotarjouksen jossako oon instryksuunit seuraavasta askelheesta jos sie täytät kaikki hyyryväärtin ehot ja sulla oon pissiin hakuaika. Silloin sie tarttet lähättää sisäle toistuksen joka vahvistaa sinun tiot. Piä sen takia vaarila ette sinun tiot oon päivitetty fliikin alla Mina sidor (Minun sivut) (kontaktitiot, sisäletulo, työnantaja ynnä muuta).

5. Kirjottaa kontrahti

Ko sie olet jättäny sinun toistukset ja sinun hyväksythään meiltä niin met lähätämmä sinun tiot hyyryväärtile ja ehotamma sinua hyyryläiseksi. Jos hyyryväärti hyväksyy sinun niin tet saatatta kirjottaa kontrahin.

Ko kontrahti oon allekirjotettu sinun jonoaika nollathaan, mutta sie seisot auttomaattisesti jäljelä niin pitkhään ko sie maksat sinun vuosimakson. Joissaki taphauksissa sie saatat pittää jäljelä sinun jonoaijan. Se jällaa jos sinun kontrahti koskee jotaki seuraavista asunotomuotoista:

• Asunto vanheemille
• Stytenttiasunto
• Nuorisoasunto
• Lyhyaikakontrahti

Mina sidor (Minun sivut)

Sie saatat nähhä mihinkä asunthoin sie olet näyttäny innostusta fliikin alla Mina sidor (Minun sivut). Sieltä sie löyät informasuuniaki sinun jonoaijasta, vuosimaksosta ja sie saatat päivittää sinun henkilötietoja. Sie häyt lokata sisäle ette päästä Mina sidor (Minun sivut).

Sisälelokkaus

Helpoin ja varmiin muoto ette lokata sisäle oon e-lekitimasuunila (BankID elikkä Freja eID+). Jos sulla ei ole e-lekitimasuunia sie saatat laittaa kontun e-postiosotheela ja salasanala.

Kontaktitiot

Asiakaspalvelu 
Telefooni: 08-785 88 30
Meili: kundservice@bostad.stockholm.se

Postiosote
Bostadsförmedlingen i Stockholm AB 
Box 7026
121 07 Stockholm-Globen